يوم من الأيام

كام يوم أخدتهم أجازة ، في محاولة جامدة جدا لأعيش في الهنتريش ..مفيييش خروج  لمحافظة الجيزة وسط الزحمة ، ولا تاكسي أركبه واستحمل رزالته  في الرغي عن البلد والعيشة واللي عايشنها ، أو مثلا يتخانق معايا علشان أديله فلوس أكتر لأنه "لعب في العداد" وضحك عليا ..لووول ..وكمان عاوز ياخدني للقسم  ، وأنا ورايا هواااا يا ابن اللذين ..

أصحابي كلهم قنوات الأفلام العربية أو الأجنبية ، باحاول اقرالى أي كلمتين يمكن ينفعوني ..وفي نفس الوقت افتح مواضيع عن معالجة البشرة بسبب التاريخ من حب الشباب ، لول برده ..وفن الطبيخ والحاجات الجامدة جدا ديه ..محاولات للرغي مع صاحباتي في التليفون عن تجاربهم العاطفية الفاشلة أو الناجحة ..وهاتك يا رغي ..

مشاعر مختلطة لسماع الأغاني القديمة  والجديدة :

إني أتنفس تحت الماااااء ..إني أغرق أغرق أغرق ..وشويه شيرين ، وبعدين celion dion ، وهكذا ..

لكن السؤال الملح ، ليه تعملي في نفسك كده ؟ !!! عاوزة أنسى ..تنسي إيييه ؟؟!!! ما علينا ..

في محاولة بائسة للنسيان ، استسلمت للأخبار ، المرة ديه أكثر درامية ..أنا باتابع جلسة خطييرة من جلسات مجلس الشعب : جلسة استثنائية لمناقشة  قانون العزل السياسي ..وطبعا الجلسة ديه بعد  ما المحكمة قضت ببطلان التشكيل الحالي للجمعية التأسيسية للدستور ...وانضرب الإخوان في مقتل ..وقد يكون هذا القانون مهددا لعدد منهم .

الجلسة استمرت ساعات ، وانا مش قادرة أغمض عنيا ..حقيقي ، ده نائب يقدم اقتراح زي د.وحيد عبد المجيد، وده نائب تاني سلفي يرفع إيده "عاوز أتكلم" ..طيب يا سيدي : إنتوا ازاااااي تسمحوا لمن وافق على التطبيع مع إسرائيل إنه يدخل المجلس ويساهم في التعليم !!!  فيسأله الكتاتني : يا ترى مين ، يقوله : د. زويل ..ما علينا ، على أساس إن الجلسة عن التعليم !!

بعد كده رئيس المجلس حواليه ميكروفونات كتيرة ، وهو بصرخة واحدة : مش هاديلك الكلمة ، تررررن في كل الميكروفونات والصوت طبعا "distorted" آخر عشرين ألف حاجة ..ونائب ثالث قام يلقي خطابا قبل أن يقول رأيه ، إللى هو بكلمتين : يا آه ، يا لأ !!
طبعا في ظل النقاش والجدال والخناق والصريخ ، اللي مش قادرة أفهم ليه ..بيصعب عليا الناس ياترى هم فاهمين حاجة ؟

أخيرا دقت ساعة الحسم :  التصويت ، موافقة ؟ الكلمة اللي اتعودنا عليها أياااااام بقى ..

الاقتراح الأول : بعدم المضي في مناقشة القانون وترك الكلمة للشارع : أقلية ..الاقتراح الثاني ..هوب وقف نائب يزعق ، لاااااا ..طبعا مفيش صوت ..الميكروفون مقفول عليه ..هو قاعد يشاور ، ورئيس المجلس : مش هاديلك الكلمة ..فضل يصرخ ومحدش فاهم هو بيقول إيه ، اداله الكلمة : خطبة عصماء في رأيه ، والكتاتني : يا سيدي موافق والا مش موافق ؟ خليني أحط كلمتك في المضبطة ..إنني وإنني :::: فيه اختراع اسمه الاختصار والدخول في الموضوع ..في النهاية وبعد إلحاح : أنا موافق على مضمون الاقتراح ، لكن أرفض الشكل .. خلاص أقعد يا سيدي ، الاقتراح الثالث : بمواصلة النقاش ..موافقة ، يلا بكره جلسة استثنائية ..

أخيرا خلصت الجلسة ، ده أنا محتاجة أنسى إللى شفته ..ده أناا محتاجة قناة التت حالا ..المتابع الجيد لجلسات مجلس الشعب هيلاقي إن ديه حاجة عاااادية جداااا ، ده الديلي لايف بتاعهم ..ما اعرفش ليه افتكرت أولى جلسات المجلس التأسيسي بتونس ..محدش يقولي مصر أحسن ، أنا رحت هناك وعارفة ..مصر أحسن في أنها تصعب عليك ، ويصعب عليك السنوات الضوئية اللي تفصلنا عن الحياة الكريمة ..فيه ديمقراطية فعلا نظريا ، لكن لما تلاقي ناس لسه بتفكر في أنها تنتخب واحد ممكن يكون غشهم ، وتهلل وتكبر كأنه داخل غزوة ، يبقى يصعب عليا ثورة قامت للتغيير ، وقبل أربعة عشر قرنا من الزمان ، حينما كان هناك رجلا عظيما قال أمتى ولم يقل مصلحتي ..

عامة ، رجعت بسرعة  لدماغ الهنتريش ..والأدهى إنه ما نسيتششششش ..

الناس لما كانت بتغني وترقص بالبدل يا جدعاااان :

http://www.youtube.com/watch?v=F5fsqYctXgM

hantresh bgad:)
http://www.youtube.com/watch?v=SDfe9dn59Mk&feature=related

w ..:))) :
http://www.youtube.com/watch?v=AYhgudctilE&feature=related